कोलोम्बो, वैशाख ७ - अण्डा पहिले कि चल्ला ? यो अहिलेसम्मकै अनुत्तरित प्रश्न हो । तर अब चल्ला पहिले भन्नेलाई बहसमा सजिलो भएको छ ।

श्रीलंकाको पहाडी क्षेत्रका एक किसानले पालेको पोथी कुखुराले अण्डाविहीन चल्ला जन्माएको छ । बीबीसीले अण्डा पहिले कि चल्ला भन्ने बहसले नयाँ मोड लिएको टिप्पणी गरेको छ ।

२१ दिनसम्म पोथी कुखुराको पेटमा रहेको अण्डाबाट सोझै चल्ला जन्मिएको वेलिमादाका भेटेरिनरी प्रमुख पीआर यापाले बताएका छन् । यद्यपि आफूले यस्तो कहिल्यै नदेखेको उनको भनाइ छ ।

जन्मिएको चल्ला स्वस्थ्य छ तर माउ भने मरेको समाचारमा जनाइएको छ । पोस्टमार्टम रिपोर्टमा पोथी कुखुराको भित्री अंगमा घाउ भएको पाइएको छ ।

श्रीलंकाको दैनिक अखबार श्रीलंका डेलि मिररले 'पहिले चल्ला, अण्डा होइन' शीर्षकमा खबर छापेको छ ।